شقاوة زمان بقلم الشاعر عوني هشام
شقاوة زمان
------------------ عوني هشام
من زمان حبيت لى واحده
وكنت ضمن العاشقين
بس كات فى طريقها واخده
قلب كل المغرمين
انا كنت زياده حبه
وقلبى دايب فى المحبه
اما جت بعنيها حبه
زاد فى قلبي دقتين
هيّ كات بنت وحليوه
وانا اسمى الواد عليوه
شفتها مره فى سيوه
وهيّ كانت من شبين
راحت الايام وعدت
والمسافه لقيتها مدت
هيّ كات فى الحب شدت
وانا طبعى يحب لين
اتقابلنا مره صدفه
حسيت بروحي بشوق ولهفه
كان كلامها ملان بعفه
وفوق خدودها نغزتبن
الشفايف ورد جورى
والرموش دول جرجروني
غلبوني .. ودوخوني
رجعت بالزمان سنين
لما كنت فى الشباب
وعندى شلة من الصحاب
كل واحد له كتاب
بقصه من حب وحنين
سرحت انا فى اول لقاء
وامتى كان بينا الفراق
حسيت بعمرى راح هباء
نزلت بعينى دمعتين
هيّ جت مسحت دموعي
وقلبى ساكن بين ضلوعي
حسيت خلاص انسد جوعي
وقلت اعيش حلم يومين
هو كان حلم وحقيقه
عيشته لحظه وبالدقيقه
فى الملامس كات رقيقه
فقت م الحلم حزين
رجعت انام يمكن احلم
ومين ياناس فى الحب يسلم
ياريتني كنت ساعتها اعلم
او حتى كان عندى يقين
الندم بيزيد جراح
اللى راح من عمرى راح
ماعاد يفيد حتى النواح
دا الدمع مايعيد مدفونين
الدمع مايعيد مدفونين
-------------------
.... عوني هشام
2022/6/27
كتبت وانا فى الطريق الى الاسكندريه
تعليقات
إرسال تعليق